Unha das miñas pezas favoritas da colección permanente é o relador de chocolate. É unha peza curiosa e bastante descoñecida para a inmensa maioría dos visitantes. Como gorentosa chocolateira que son, chamoume moito a atención a primeira vez que a vin. Estas táboas para picar chocolate empezaron a fabricarse no s. XVIII, cando o chocolate se converteu en bebida de moda en Europa. Pero esta novidosa bebida non estaba ao alcance de tódalas clases sociais, e ata o s. XIX non se popularizou grazas á creación de fábricas de chocolate por todo o territorio peninsular. En Galicia os ricos e os curas tomaban o chocolate moi concentrado e denso mentres que os campesiños consumíano moi disolvido, para que rendera máis.