Exposicións Actuais
ENTROIDO
máscaras e toucados
Do 7 ao 25 do mes de febreiro.
Sala da Madeira Escavada
Entrada Libre
Este ano a programación do Entroido está dedicada especialmente aos Boteiros dos que poderemos contemplar as máscaras e outros adobíos dos Boteiros de Viana do Bolo e de Vilariño de Conso cedidos temporalmente pola Asociación de Fulións Rurais e polo Concello de Vilariño de Conso.
Recolle, ademais, outras carautas representativas do Entroido galego como as do Triángulo Máxico ourensán: Peliqueiro de Laza, Cigarrón de Verín e Pantalla de Xinzo; a carauta de Merdeiro de Vigo; e, do Morrazo, o espectacular sombreiro de Madama do Entroido de Cobres en Vilaboa, cedido temporalmente por Noelia Lameiro Cortegoso.
CONVITE AO AVECER
de aires, doenzas e feridas
Nuria Ferreiro
Investigación e creación artística de Nuria Ferreiro arredor da etnomedicina e do patrimonio inmaterial galego, que é a esencia dun pobo á par que o seu elo máis fráxil.
A artista establece con esta exposición unha realción directa entre distintos campos de coñecemento como o son a etnografía, a antropoloxía e a arte contemporánea.
«O eixo de interese persoal radica no tema da etnomedicina, xa que, un exemplo de bens intanxibles que urxe conservar son os ensalmos que se empregan en ritos favorecedores ou propiciatorios e que son transmitidos oralmente de xeración en xeración. Os vencellos persoais que como autora me unen a estes textos teñen que ver coa miña nai Rosa, a miña avoa Celia e a miña bisavoa Alicia, pois o meu contacto con este particular mundo é a través delas».
Os resultados artísticos sitúanse no ámbito da instalación e os materiais empregados, ademais de ser na súa maioría elementos cotiás que se empregan xunto coas verbas, funcionan como un nexo común entre as distintas obras.
Ancestros Tecnolóxicos
A imposibilidade de ofrecer unha historia completa da tecnoloxía pola súa amplitude e complexidade, tornou imprescindible realizar unha escolma de pezas que mostraran unha evidente evolución.
Así, os ámbitos representados obedecen a cinco categorías simbolizadas por senlleiras pezas que os identifican:
O doméstico: a numerosa produción de enxoval que o caracteriza fixo necesario elixir un tipo de pezas que, neste caso, limitouse a batedoras, picadoras e reladores.
A oficina: a importancia do auxe do traballo administrativo que supuxo un fito na incorporación da muller ao traballo asalariado, determinou a elección das máquinas de escribir amais das outras pezas exhibidas.
Os medios de comunicación: o teléfono, a radio e a televisión simbolizan a auténtica revolución que produciu a súa aparición na sociedade mudando hábitos e formas de relacionarse e converténdose, tamén, en elementos de entretementos e non só comunicativos. Exemplifican perfectamente o estreito vencello entre ciencia, técnica e tecnoloxía nunha frutífera simbiose para a humanidade.
O ocio: a música, o xeito de consumila, mudou no momento en que xorden gramófonos, gramolas, tocadiscos pero tamén as radios, medio de difusión e comunicación que se converte co advenimento das radiofórmulas e das radionovelas nun elemento de esparcemento para todas as franxas de idade.
A arte: representada pola fotografía e os aparellos que acompañaron ao ser humano no seu devezo por conxelar o tempo: as cámaras fotográficas e a súa evolución.
