Exposicións Actuais
Máscaras rituais IV
Do 18 de febreiro ao 8 de marzo de 2025
Sala de «A madeira escavada»
No marco da celebración da festa cíclica anual do Entroido, o museo exhibe, como cada ano, unha escolma de máscaras e toucados protagonistas destas datas.
Destacamos este ano as máscaras recuperadas da tradición ou creadas recentemente que, co devir do tempo, pasarán a nutrir e enriquecer o acervo cultural do noso pobo.
Así, xunto cos icónicos protagonistas do triángulo máxico ourensán como Peliqueiros, Cigarróns e Pantallas, os espectaculares Boteiros, os «nosos» Merdeiros, e as preciosistas Madamas e Galáns, exhíbense este ano o Follateiro de Lobios, o Vixigueiro de Samede, o Cacharelo de Lalín e a Gárgola de Celanova.
Esta exposición non sería posible sen a colaboración desinteresada de persoas e colectivos que nos contaxian a súa paixon polo Entroido e nos enriquecen coa súa sabedoría e habelencia.
A todos, o noso agradecemento: Asociación Cultural Follateiros de Lobios (Ourense); Asociación Cultural Entroido de Samede (A Coruña); Concello de Celanova (Ourense); Asociación A Cacharela de Lalín (Pontevedra); Asociación de Fulións Rurais de Viana do Bolo (Ourense); Noelia Lameiro Cortegoso (Cobres, Pontevedra); Centro Social A Revolta (Vigo); Sabela Rodríguez Jardón; Familia Campos Gómez.
Peladas eran,
peladas serán...
tódalas meigas
que andan polo chan
Do 1 de xaneiro ao 30 de xuño de 2025
Sala de «A arte de curar»
A artista Rebeca Lar reinterpreta as corozas empregadas como elemento estigmatizante pola Inquisición. Na obra, aparecen bordadas con textos do Malleus Maleficarum que proclamaba o carácter maléfico feminino. Reflexiona sobre o papel das mulleres acusadas e cuestiona estereotipos de xénero vinculados coa figura da bruxa condenada, en moitas ocasións, pola súa participación no eido da menciña popular.
Enmárcase na liña de investigación teórico-artística da artista, centrada na linguaxe, a memoria e os estudos de xénero, desenvolvendo unha serie de obras de carácter feminista co bruxesco feminino como marco conceptual.
Alebrijes (México)
Propiedade de X. Maañón e L. Losada
